فبراير 2, 2023
Bclic
رياضة

اوتزي : الرجل الذي عاش 5 الاف سنة و عثر عليه متسلقو الجبال

يوم 19 سبتمبر 1991، وعلى الساعة منتصف النهار تقريبا، زوز من متسلقي الجبال الألمان، “هيلموت سيمون” وزوجته، كانو يعملو في رياضة التسلق المعهودة متاعهم على طول سلسلة جبال الآلب بين إيطاليا والنمسا المعروفة باسم “أوتزال” وتحديدا في منطقة اسمها هاوسلابيوخ، لقاو جثة مجمدة مدفونة في وسط الثلوج الكثيفة، وطبعا وقتها وما ما كانش عندهم أدنى فكرة انو الشخص هذكا باش يطلع أقدم كائن بشري محفوظ عثرت عليه البشرية.الزوجان مشى فيبالهم الجثة تعود لمتسلق توفي منذ فترة قريبة، وتجمدت الجثة متاعو بفعل الثلوج والطقس الجليدي، وين مشاو خبرو عليه ومن غدوة، حضرت الشرطة المختصة ومجموعة من حراس الغابات، وحبو ينتشلوه، لكن ما لقاوش طريقة فعالة إضافة إلى أنو الجو كان شديد البرودة والثلج يتساقط بغزارة.من غدوة، انتشرت الحكاية انتشار النار في الهشيم، وين هبت جموع المتسلقين من كل حدب وصوب، وكانوا تقريبا 8 مجموعات، منهم أشهر زوز متسلقين وقتها الألماني هانز كامرلاندر والإيطالي رينولد ميسنر (الي في الصورة الزوز)، وين اسخرجوا الجثة ببراعة كبيرة مساء يوم 22 سبتمير 1991. الجثة هذي تسمات ببرشة أسماء، منها “أوتزي رجل الثلج”، أو رجل الجليد، أو بيساطة أوتزي، الي تسمى تيمنا بالوادي الي اكتشفوه فيه، ممبعد تم نقلو لجامعة إينسبروك في النمسا، وين تعرفو عليه إنو إنسان بدائي، كان طولو 150 سم ويوزن حوالي 50 كلغ، وحسب التحليلات المخبرية تبين انو توفي عن سن تناهز 45 سنة، السيد هذا بقى تقريبا محنط في الجليد مدة 5300 سنة، طبعا بسبب البرودة القاتلة هناك وبسبب تكمش وتصلب الجسم متاعو كذلك بقى محافظ نوعا ما على الملامح متاعو شوية، والغريب انو وجهو مازال محتفظ بالملامح الأصلية متاعو، لقاو كذلك انو أوتزي مات مقتول برمح دخل في جسمو من الخلف اخترق الرئة اليسرى متاعو مباشرة.لقاو كذلك انو أوتزي تقتل في فصل الربيع، وين وجدو انو في الرئة متاعو فما بقايا البَوغ (spore)، الي تتواجد في الفصل هذكا بالذات وتساهم في تغير الوضعية متاع النبات، ثم في صدمة كبيرة في شهر ماي 2012، اكتشوفو انو مازال عندو خلاية دم سليمة، حيث فحصوها مجهريا وما صدقوش الي شافوه، رغم انو الحادثة مر عليها 5300 سنة.طبعا المومياء هذي وصلت عملت مشكلة سياسية بين إيطاليا والنمسا، وين كل دولة طالبت بأحقيتها فيها، وفي الآخر رجعت لإيطاليا سنة 1998، وين يتواجد لليوم في متحف جنوب تيرول للآثار في مقاطعة بولزانو. المثير للريبة حقا انو المومياء هذي انتشرت عليها برشة شائعات إنو ملعونة، وقالو انو برشة من المكتشفين من الي تعاملو معاها توفاو في ظروف غامضة، وانتشرت الشائعة هذي لليوم وين مازالت برشة ناس تصدقها، رغم الي طبعا أكثر المتسلقين يتعرضوا لحوادث مميتة يعني مش صدفة أو لعنة.

صورة تقريبية مبنية بالكومبيوتر لأوتزي

اوتزي رجل الثلج

المراجع للتعمقMurphy, William A., Jr.; zur Nedden, Diete

; Gostner, Paul; Knapp, Rudolf; Recheis, Wolfgang; Seidler, Horst (24 January 2003), “The Iceman: Discovery and imaging”, Radiology, 226 (3): 614–629, doi:10.1148/radiol.2263020338, ISSN 0033-8419, PMID 12601185.

Related posts

قناة تونسية تقتني حقوق بث البطولة

Admin

مقابلات الرابطة المحترفة الأولى لكرة القدم على قناة حنبعل

Admin

تورط كريستيانو رونالدو مع جوفنتس الايطالي !

Oussama Saafi

Leave a Comment